CEBU, Philippines - Naglumbaanay ang siyudad sa Sugbo ug Tagbilaran sa kinadaghanan og kaso sa dengue dinhi sa Central Visayas taliwala sa nasinating pag-ulan-ulan niining panahona.
Atol sa gipahigayong tigum sa mga Regional Dengue Coordinator sa Department of Health (DOH-7) kagahapong adlawa nga gitambungan usab sa mga city health officer Bohol, Negros ug Sugbo.
Si Dr. Jocelyn Abellana, dengue coordinator sa DOH-7 mipakita nga miabot na og 3,665 ang mga kaso sa dengue dinhi sa Central Visayas gikan sa Enero hangtod sa Agosto 14.
Ang siyudad sa Sugbo maoy pabiling nag-una nga dunay 840 ka kaso ug siyam ang namatay, gisundan sa siyudad sa Tagbilaran sa 252 ka kaso ug duha ang namatay, siyudad sa Talisay, 147 ug usa ang namatay; Toledo, 116; Danao 109; Lapulapu, 103; Dumaguete, 89; Naga, 69; Mandaue, 65 ug Sibulan, Negros Oriental 8.
Sa kinatibuk-an, matud ni Abellana, ang gidaghanon misaka og 9 porsiyento nga gikaalarma sa mga opisyal sa panglawas hinungdan nga gilusad ang ‘mid-year program implementation review’ sa dengue. – BANAT NEWS