CEBU, Philippines - Kritikal ang kahimtang sa usa ka 22-anyos nga construction worker human kini nakuryentihi kagahapon sa alas 11 sa buntag samtang naghigot og alambre sa atop sa gitukod nga badminton gym sa barangay San Roque, dakbayan sa Talisay.
Si Jomme Pananganan, taga sitio Libo, barangay Mohon ug construction worker sa sub-contructor sa Tuanzon Construction kinsa maoy mi-construct sa nahisgutang gym, nadala gyud sa Talisay City District Hospital, apan gibalhin kini sa Vicente Sotto Memorial Medical Center.
Ang kagawad sa barangay nga si Rafael Chan sa pakighinabi sa Banat News kagahapon nagkanayon nga ang badminton gym nahimutang daplin sa karsada duol sa linya sa Visayan Electric Company (VECO). Si Pananganan nagbugkos og alambre sa atop aron mabutangan og aluminum ventilator sa dihang misaghid ang alambre sa main line sa VECO. Matud ni Chan nakabati siya’g boto sa ibabaw. Iyang nakita si Pananganan nga nasangit sa trasher ug nagkirigkirig nga nagsiga ang lawas hangtod natagak. – BANAT NEWS