CEBU, Philippines - Nasikop sa kapulisan ang usa ka kusinero tungod sa pagdala og armas sa iyang bag samtang kini nagluto og larang diha sa dalan Osmeña ning dakbayan sa miaging kaadlawon.
Si Chief Insp. Michael Anthony Bastes nga nahinabi sa Banat News miila sa suspek nga mao si Joven Dinopol, taga sitio Maladpad barangay Bunaan sa lungsod sa Seaton, Negros Oriental ug temporaryong nagpuyo sa sitio Pusoan, barangay Buhisan ning dakbayan.
Si Dinopol nakuhaan og usa ka .45 kalibreng pistola nga gisulod sa kolor itom nga bag, may upat ka magazine, 34 ka buhing bala, ‘rambo knife,’ nunchaku, usa ka bonnet kolor itom, “purong” , usa ka kolor itom nga jacket ug usa ka bakos.
Si Bastes miingon nga nakadawat sila og tawag gikan sa usa ka concerned citizen nga dunay armado sa maong dapit.
Si Dinopol dihang nahinabi sa Banat News mihimakak nga iya ang maong bonnet kinsa miingon nga sa igsuon sa iyang amo ang tag-iya niini nga gamiton kun magmaneho sa motorsiklo ug natungnan lang nga diha sa iyang bag gibutang.
Hinuon iyang giangkon nga iya ang maong armas human iyang gipalit sa kaila sa anak sa iyang amo, giangkon niyang mipalit siya niini tungod sa hulga sa usa ka kanhi boksidor nga taga dalan B. Rodriguez nga iyang gikabikil. – BANAT NEWS