CEBU, Philippines - Tulo ang naangol sa dihang nakigpinusilay ang grupo sa mga batan-on sa usa ka guwardiya ug sa polis atubangan sa usa ka disco bar sa barangay Poblacion, siyudad sa Toledo kagahapon sa alas 2 sa kaadlawon.
Si Cedric Melor Sumampong, 24, taga barangay Butong, lungsod sa Ronda naigo atol sa pinusilay. Napagan usab si Ramil Salbatona Traya, 19.
Naangol usab ang sakop sa grupo nga nakigpinusilay nga mao si Ali Salbatona ug Carlo Bocanegra, 31, mga molupyo sa sitio Climaco, barangay Poblacion, Toledo.
Matud pa ni SPO4 Gil Lastimosa sa Toledo City Police Station sa dihang nahinabi sa Banat News nga si Sumampong kalit lang gipusil sa grupo ni Salbatona ug Bocanegra samtang nagbarogbarog gawas sa diskohan. Gikulata pa gyud si Sumampong ni Bocanegra bisan nasamdan na kini sa walang bahin sa lawas.
Ang guwardiya sa disco bar nga si Rodrigo Cenonas mibadlong unta ni Bocanegra apan misukol kini.
Naatol nga naagi si PO3 Lorenzo Gutang ug mibadlong sa grupo ni Bocanegra, apan misukol kini sa dihang gisulayan sa pagdakop.
Naka-ikyas si Bocanegra ug sa pagbalik, nakigpinusilay kini sa guwardiya. Apan nasikop kini ni PO3 Gutang nga wala makabiya hinungdan nga nakuhaan og .38 kalibre nga paltik nga dunay duha ka buhing bala.
Si Sumampong ug Bocanegra nadala sa Toledo District Hospital, apil na ang napagan nga si Ramil Salbatona.
Si Ali Salbatona ug ang guwardiya gipangita kay mi-eskapo. – BANAT NEWS