CEBU, Philippines - Gikahibulong kaayo ni kanhi Mandaue City Councilor Alfonso Boy Albano ang hukom sa kagamhanan sa Mandaue ang pagwagtang sa Mantawe Festival ug gipulihan sa Comparza.
Ang Mantawe Festival gimugna kaniadto sa panahon pa ni kanhi Mayor Teddy Ouano. Giingong diha gikuha ang pangalan sa Mandaue sa Mantawe Vine nga nanurok sa maong lugar kaniadto.
Samtang ang Comparza maoy bangga sa abilidad sa pagsayaw sa duyog sa kinaraang tukar nga gihimong kalingawan bisan sa wala pa ang Ikaduhang Gubat sa Kalibutan dili lang sa dakbayan kondili sa nasud nga Pilipinhon.
Si Albano nga nahinabi sa DyKC miingon nga dili siya supak nga wagtangon ang Mantawe Festival tungod kay iya man kining prerogative sa administrasyon ni Mayor Jonas Cortes.
Apan matud niya nga nahingangha lang siya sa dihang nakadungog siya sa komentaryo ni Emilio Pascual nga maoy historical consultant sa siyudad sa Mandaue nga miingon nga “wa nay dahon-dahon.” Ang maong pamahayag gisabot nga wagtangon ang Mantawe Festival tungod kay dili man tinuod nga diha kuhaa sa Mantawe vine ang pangalan sa Mandaue.
Si Albano nga usa sa nagmugna sa Mantawe Festival, ug karon Executive Director sa Mantawe Foundation miklaro gyud nga tinuod ang tanom nga Mantawe. Gani sumala pa niya, niadtong June 30, 1980 si Atty. Amado Otarra Jr. nga maoy naghimo sa Official Seal sa Mandaue mimatuod nga ang duha ka sanga nga adunay dahon diha sa maong selyo mao ang Mantawe.
Hinuon sa press conference nga gipahigayon si Pascual mipasabot nga ang Mantawe Festival nahimo na nga usa ka foundation ug dili na kini maangkon nga iya sa dakbayan. – BANAT NEWS