CEBU, Philippines - Pasidungog nga gihatag ni Santo Papa Benedict XIII gihulagway sa Arsobispo sa Sugbu nga si Ricardo Cardinal Vidal nga usa ka simbolo sa kadaugan ug mihagit kanila sa pagpadayon sa ilang maayong binuhatan.
Kagahapon sa hapon ang Arsobispo mihatag “Pro Ecclesia et Pontifice” kon “For Church and the Pope” o nailhan usab nga “Cross of Honor” medal diha sa Metropolitan Cathedral.
Ang mga nakadawat og award kagahapon mao ang magsuong Kongresista Eduardo Gullas ug Jose Gullas, Kongresista Pablo Garcia sa ikaduhang distrito sa probinsiya sa Sugbo, kanhi Kongresista Antonio Cuenco, Atty. Paterno Acabodillo, Marimel Bautista, Natividad Bondoc, Recaredo Borgonia.
Lakip sa gipasidunggan mao sila si Jose Mari Cañizares, Celestino Condor, Pericles Dakay, kanhi Kongresista Raul Del Mar, Victoria Enriquez, Amado Go, Giovani Iacono, Belen Japson, Emerito Lumapas, Sr. Ma. Rosa Magapan, DST, Atty. Makilito Mahinay, Margarita Maria Matheu, Fe Lola Melgar, Juanita Montesclaros, Priscilo Orcullo, Arsenio Pacaña, Rev. Fr. Roderick Salazar Jr., SVD, Sabas Lee Suarez, Mary Sy, Sr. Ma. Florita Taylaran, RVM, Elvira Urpiana, Paz Wong ug Joseph Yu.
Atol sa iyang wali, si Vidal nagkanayon ngadto sa mga awardees nga ang ilang paghigugma sa Simbahan ug paghatag og kaayohan ngadto sa uban maoy hinungdan nga sila gihatagan sa maong pasidungog.
“This is more than a Cross of Honor but a sign of victory,” ni Vidal pa ngadto sa mga awardees.
Gilakbit usab ni Vidal ang mga maayong buhat ni Hesus Kristo ngadto sa iyang isi’g ka tawo ug si Beato Pedro Calungsod nga dako og pagsalig sa Diyos ug mihimo og mga maayong buhat alang sa isig ka ingon.
Ang Arsobispo nanghinaot ngadto sa mga awardees nga ipadayon ang ilang dakung gugma sa simbahan ug maayong buhat tungod kay bisan og mawagtang man sila dili sila makalimtan sa umaabot nga mga henerasyon.
Ang Cross of Honor unang gihatag ni Santo Papa Leo XIII niadtong Hulyo 17, 1888 atol sa pagsaulog sa golden sacerdotal jubilee. Kini gihatag ngadto sa babaye ug lalake nga dako og natampo sa simbahan ug sa uban. (BANAT)