CEBU, Philippines - Naputos sa bun-og ang usa ka German human kini gipareglahan sa mga batan-on sa barangay Pajo dakbayan sa Lapulapu kagahapon sa kaadlawon.
Ang biktima mao si Deltef Kurt Seiler, 48, nga tag-iya sa usa ka KTV Bar sa maong dapit.
Base sa reklamo niini ngadto sa kapolisan, alas 3:00 kagahapon sa kaadlawon samtang naglingkod kini sa iyang motorsiklo gawas nga bahin sa iyang KTV Bar pito ka mga batan-on ang miduol kaniya.
Pipila ka gutlo kalit lang mipaka ang iyang likod gumikan sa paghapak sa usa sa mga batan-on ug sa dihang mipalag siya gitabangan na hinuon kini og kuninit sa mga batan-on.
Si Seiler nga nahiagum og ubay-ubay nga samad ug bun-og sa kalawasan gidala sa tambalanan.
Matud pa ni Seiler nga ikaduha na kini ka higayon nga siya gipareglahan sa mga batan-on sa maong dapit.
Gumikan niini nakahukom nalang ang maong langyaw nga mopauli nalang sa ilang nasud ug iyang ibaligya ang iyang balay kalingawan sa maong dapit.
Samtang ang kapolisan mihimo na og mga lakang sa pag-ila sa mga batan-on nga miparegla sa maong langyaw’ng negosyante. (BANAT)