CEBU, Philippines - Gikabalak-an sa kagamhanan sa dakbayan sa Talisay nga mosaka pa ang kaso sa dengue sa siyudad diin may 137 na ka kaso kasagaran mga menor de edad ang natala sukad niadtong Enero hangtod sa Hunyo niining tuiga.
Ang hepe sa Talisay City Health Office nga si Dr. Lino Alanzado mibutyag nga niadtong buwan sa Enero, nakatala sila og 34 ka kaso , nahimong 40 sa pagka Pebrero, nadugangan og 18 niadtong Marso, 26 sa pagka Abril, 12 niadtong Mayo ug pito sa pagka Hunyo.
Matud ni Alanzado nga usa ka bata ang namatay sa barangay San Isidro ug laing usa sa barangay Camp 4.
Ang health officer nabalaka nga mosaka pa kini tungod sa pagpunay og bunok sa uwan nga gani niadtong milabay’ng unom ka buwan ting-init man kini apan adunay daghang nabiktima sa dengue.
Matud ni Alanzado nga ang dengue task force padayon sa pagpahigayon og mist blowing ilabi na sa mga tulunghaan sa barangay Poblacion.
Ang city health officer miawhag sa publiko nga motabang usab sa pagbantay batok sa dengue aron walay bisan usa sa ilang pamilya ang mabiktima.
Sa samang higayon gikinahanglan usab nga manglimpiyo kanunay sa palibot ug tabonan ang mga pundong tubig nga gamitonon sulod sa balay aron dili kaitlogan og lamok nga dunay dengue.
Giawhag usab ang mga molupyo sa kabarangayan nga motawag dayon sa buhatan sa city health kung may mabantayan sa ilahang mga silingan nga gi-dengue aron kini matambalan dayon ug dili mograbe ang problema. (BANAT)