CEBU, Philippines - Gipasakaan og kasong kriminal ug administratiba ang hearing officer sa National Police Commission (NAPOLCOM)-7 ngadto sa buhatan sa Visayas Ombudsman tungod sa pagpakauwaw sa kanhi driver sa maong buhatan.
Ang gipasakaan og kaso mao si Atty. Onasis Pata, Hearing Officer V sa NAPOLCOM- 7 ug lumad nga taga dalan Fortich, Banawa ning dakbayan.
Matud pa sa reklamanteng contractual driver sa NAPOLCOM nga si Engilberto Caumeran, taga V. Rama Avenue ning dakbayan mibutyag nga niadtong Hulyo 28 sa alas 10:00 gipatawag siya ni Pata sa sulod sa Conference Room bisan og nag-hearing pa si Atty. Aloha Pañaranda.
Giingong kalit nga gipatiran ni Pata ang pultahan sa conference room ug kay aduna may nag-hearing gipabalhin siya sa opisina sa direktor ug didto gipangutana siya kun nakaila ba siya sa usa ka Gerladine Pasilan.
Tungod kay wala siya makaila kaayo sa maong tawo mihimakak siya niini apan gikasuko kini ni Pata ug gibalikas siya pag-ayo, gisingkahan kay namakak siya, giakusahan usab siya niini nga buot niini paawayon sila sa usa ka opisyal sa kapolisan.Sumala pa niini nga gihataan pa siya niini paglabay og remote control sa telebisyon.
Dihang nakit-an niya ang maong babaye iya kini nahinumduman nga usa diay ka aplikante nga nagpunay og follow up sa buhatan ni Pata aron mo-waive sa height requirement sa pagsulod sa police.
Tungod niini, gibalikas siya pag-ayo atubangan sa ubang mga kawani ug gisingkahan.
Buot usab ipaimbestigar ni Caumeran sa Ombudsman ang ubang kahiwian sa maong opisyal sama sa pagpanso niini sa iyang daily time record apan wala gyud motrabaho sa opisina tungod kay nag-private legal practice kini.
Lakip sa buot paimbestigahan ni Caumeran mao ang giingong kadaghan sa mga absences ni Pata nga walay official leave, kapakyas sa pagsulbad sa death benefit claims ug pagtinil og police security sukad pa niadtong tuig 2008.
Si Deputy Ombudsman for the Visayas Pelagio Apostol gikatakdang mohatag og igong panahon ni Pata aron makatubag sa maong alegasyon. (BANATNEWS)