CEBU, Philippines - Usa ka seminar nga magtuki kalabot sa panginabuhi, negosyo, pag-atiman sa panglawas ug uban pa, gitakda nga ipahigayon unya sa Agosto 21, 2010 sa Cebu Business Hotel, sa dalan Colon ning dakbayan sa Sugbo gikan sa alas 6:30 hangtod sa alas 8:00 sa gabii.
Ang maong seminar adunay tema nga : Technology Research: its application to livelihood, heath, wellness, and business.
Dumalahon kini sa mga inila ug nabantog na kaayong mga mamumulong o speaker ug lecturer sama kang Dr. Silvano B. Maranga, Mr. Greg R. Mercado ug Mr. Alvin Calagahan.
Ang unang bahin sa maong seminar maghisgot bahin sa panukiduki sa teknolohiya ug ang iyang dakong mahimo alang sa panguma, panagat, ug uban pang matang sa panginabuhi.
Ang ika-duha mao ang bahin sa mga konsepto ug mga paagi sa pag-ugmad sa maayong pag-atiman sa panglawas ug sa kaayohan niini.
Ang ikatulong bahin mao ang pagtuki sa mga konsepto bahin sa panginabuhi, pamatigayon ug mga paagi sa pagpalambo niini. (BANATNEWS)