CEBU, Philippines - Tulo ka tanod ang gipusil sa grupo sa mga batan-ong gidudahang mga sakop sa gang kagahapon sa kaadlawon diha sa P. Del Rosario Extension sa barangay San Antonio samtang kini ilang gigukod atol nga nag-roving niadtong tungora nga miresulta sa pagkasikop sa usa ug nakuhaan og armas.
Ang tulo ka tanod mao sila si Sonny Calomarde, Tomas Argende ug Makoy Dulaita, pulos tanod sa barangay Kamagayan ning siyudad midakop ni Argel-Jan Mananquel, 18, taga dalan F. Ramos ning siyudad nga giingong sakop sa gang ug nagtungha sa usa ka inilang unibersidad sa dakbayan sa kursong Hotel and Restaurant Management.
Si Calomarde dihang nahinabi sa Banat News mitug-an nga nag-roving sila niadtong higayona dihang ilang nakit-an ang tulo ka batan-ong lalaki gikan nanaog sa jeepney diha sa Junquera Extension nga gituohang gikan nanulis sa mga pasahero.
Matud pa, nga dihang ilang gisinggitan og “hoy” ug gimanduang pahunungon nanagan hinuon ang tulo ug ang usa niini nagpasalba sa dalang armas hangtud nga nahitabo gyud ang ilang ginukdanay.
Ang grupo nagkatibulaag apan ang usa naabtan ug nakuhaan og usa ka .38 snub nose revolver nga dunay upat ka buhing bala.
Diha sa Parian Police Station kusganong gihimakak sa suspek nga mipusil sila sa mga tanod ug midugang usab nga dili iya ang armas nga nakuha gikan sa iyang posesyon.
Si Mananquel mitug-an nga gikan silang nag-inom sa iyang barkada gawas sa ilang balay ug paingon sila sa dalan sa Junquera ug ilang gipintalan og ‘X’ ang pangalan sa karibal nga gang nga gipangsuwat sa bungbong sa kadalanan.
Apan pag-abot nila sa maong lugar ilang nakit-an ang karibal nga grupo nga nanagan palayo sa lugar ug misunod ang butobuto sa armas, sumala pa niya nga wala siya masayod kun si kinsa sa iyang mga kauban ang mitunol sa maong armas diha kaniya ug iyaha kining gipasalba. (BANATNEWS)