CEBU, Philippines - Namatay dihadiha ang usa ka lalaki human kini pusila sa wala hiilhing criminal sa dalan Magallanes, barangay Ermita ning dakbayan sa Sugbo sa miaging hapon.
Ang biktima nailhan nga si Jerry Rosal, alias “Kulot”, 49, minyo nga taga Ermita.
Sumala ni Renan Batersal, usa ka security guard sa usa sa mga establisamento sa Magallanes miingon nga naglingkod sa lingkoranan sa aseras ang biktima samtang namili kini og DVD tape.
Apan kalit lamang may wala hiilhing tawo nga miduol sa likod sa biktima ug milanit sa iyang armas de fuego dayong pauwan sa mga bala niini sa nagkalainlaing lawas sa biktima.
Mibuy-od sa aseras nga wala nay kinabuhi ang biktima nga naglunang sa kaugalingon niyang dugo samtang milakaw usab dayon ang kriminal paingon sa usa ka nagpaabot nga motorsiklo.
Padayon pang gipangita sa kapolisan ang kriminal. - BANAT NEWS