CEBU, Philippines - Usa ka notadong drug pusher nasikop sa mga otoridad sa kapolisan atol sa buy bust operation didto sa Barangay Jagobiao, dakbayan sa Mandaue sa milabay’ng hapon.
Ang nasikop mao si Roel Laurente, 31, minyo, nga taga Sitio Upper, Barangay Jagobiao, dakbayan sa Mandaue.
Matud pa ni OIC Chief P/Insp. Wilson Abot sa Police Station 5 sa Mandaue City Police Office nga dugay na nilang giobserbahan ang pamatigayon og ginadiling drugas ni Laurente. Dihang positibo na kaayo ang tanan, gilusad dayon nila ang usa ka buy bust operation sa alas 5:15 ang takna sa milabay’ng hapon.
Pinaagi sa usa ka polis nga nagpaka-aron ingnong buyer og shabu, dali kaayong gitunol ni Laurente ang duha ka paketeng shabu ngadto sa decoy human niini madawat ang minarkahang salapi.
Dihadiha gisikop dayon ang suspetsado sa mga otoridad ug gisakmit pagbalik ang P200 nga marked money, ug laing duha ka paketeng shabu gikan sa mga kamot sa suspek.
Kasong kalapasan sa Akta Republika 9165 ubos sa Sec. 5 Art. II ang ipasaka sa kapolisan batok ni Laurente. – BANAT NEWS