CEBU, Philippines - Tungod sa nasinating kahuot sa dalan diha sa nasunogan sa barangay T. Padilla nga nakaingon sa pagkabalda sa dinaliang pagresponde sa mga bombero gilaraw sa dakbayan ang paghawan sa mga barong-barong sa mga gagmay’ng dalan nga gitukod sa mga daplin niini. Si Mayor Michael Rama mipasusi na sa engineering department sa dalan F. Villa sa maong barangay diin nahitabo ang pagkatanggong sa mga firetrucks gumikan kay dili makaagi tungod sa mga barong-barong. Tumong sa mayor nga palapdan ang dalan sa maong dapit aron sayon ra makasulod ang mga moresponde sa higayon nga dunay emerhensiya nga mahitabo sama sa sunog.
Si Rama kinsa miadto sa dapit atol sa pagkasunog mibutyag nga saksi siya sa kahuot sa dalan ug miingon nga naglisod ang mga dagkong fire engines sa pagsulod.
Matud pa sa mayor usa sa mga gikinahanglan sa mga biktima mao ang pagkaon, sinina, tubig ug uban pa busa ang siyudad miapod-apod na og mga pagkaon sa mga naapektuhan sa sunog ug gikatakda usab sila nga makadawat sa sunod adlaw og mga nag-unang materyales sa panimalay.
Mitumaw ang kabalaka sa mga biktima nga dili na sila tugutan pang makabalik og tukod og balay sa maong lugar tungod kay giingong ang adunay pribadong mga pamilyang nanag-iya niini. Apan si Rama atol sa sunog namahayag nga dili rason ang pagkasunog sa kabalayan aron mapapahawa ang mga namuyo sa usa ka dapit.
“It is like adding insult to injuries,” matud pang Rama sa mga sakop sa media. – BANAT NEWS