CEBU, Philippines - Duha ang namatay ug unom ang nangalandig sa tambalanan lakip na niini ang usa ka mabdos human mangahilo sa gikaon nga butete nga nakuha sa panagat nga ilang gilarang ug gitunoan og lubi diha sa barangay Cabutungan, lungsod sa Santander alas 10 sa gabii niadtong Domingo.
Ang namatay mao ang mananagat nga si Rolandio Tano alyas Romy, 48, molupyo sa nahisgutang lugar ug ang barangay tanod nga si Alejandro Cuerpo, 51, nagpuyo gihapon sa maong dapit.
Samtang ang laing unom nga nalandig sa tambalanan nga sila si Irene Tano nga anak sa namatay nga si Tano, 19, ug tulo ka buwang mabdos; Luigi Tano, 13, anak gihapon ni Tano; Salvador Base, 48, ug amahan niining si Baldomero Base, 69, anak niining si Raymund Base, 16, ug Algie Cuerpo, 28, kabanay sa namatay nga si Cuerpo.
Matud pa ni PO1 Roel Gerodias sa Santander Police Station sa dihang nahinabi sa Banat News subay sa imbestigasyon ang maong mga pamilya nga pulos managsilingan nangaon sa gilarang sa miaging gabii.
Ang maong butete nakuha ni Rolando Tano sa iyang ‘bubo’ niana pang pagka-adlawan nga gibanabanang moabot og lima ka kilo ug samtang nag-inom daplin sa baybayon giluto nila ang maong isda.
Apan niana nang pagka alas-9 ngadto na sa alas-10 sa gabii unang mireklamo si Tano sa pagsakit sa iyang tiyan ug pagpanglipong ug mihangyo nga magpahatod sa tambalanan apan sa dihang paingon nang dad-on namatay kini.
Samtang ang tanod nga si Cuerpo mao gihapoy gipamati sa lawas ug nagsuka-suka ug pagpanglipong hinungdan nga gidali kini paghatod sa Oslob District Hospital apan gideklarar gihapong dead on arrival.
Samtang ang ubang mga nakakaon nakasinati gihapon og susamang gipamati hinungdan nga gidali sila pagdala sa lokal nga tambalanan ug gilahos sa Vicente Sotto Memorial Medical Center.
Sumala pang Gerodias nga base sa ilang nakuhang kasayuran nga kaniadto pa mangaon na og butete ang mga biktima apan nagduda sila karong posibleng gumikan sa kahubog nasipyat sila paglimpyo niini ug wala makuha ang parte sa lawas niini nga adunay hilo.
Ang butete kon “puffer fish” o blow fish sa pinulungan Ingles sumala pa sa mga eksperto adunay tetrotodoxin nga usa ka matang sa neurotoxin nga moatake sa kaugatan sa tawo lakip na sa kasing-kasing ug kaunoran. Sumala pa sa website sa Wikipedia, ang makakaon sa tetrotodoxin sa butete magpamati sa pagbinhod sa dila, ngabil, pagsuka ug pagkalipong ug mosunod niini ang pagbinhod sa tibuok kalawasan, paspas nga pitik sa kasingkasing apan pag-us-os sa blood pressure mosunod niini ang pag-atake sa kaunoran sa diaphragm nga maoy nagpadagan sa atong baga hinungdan nga maglisod og ginhawa ang tawo ug molagom dayon mamatay. – BANAT NEWS