CEBU, Philippines - Supak ang Department of Interior and Local Government (DILG)-7 sa sugyot niBise Presidente Jejomar Binay nga wagtangon na lamang ang election sa Barangay ug sa Sanguniang Kabataan aron kaminusan ang gasto sa nasudnong kagamhanan.
Matud pa ni DILG-7 legal officer Danilo Almendras nga dili usab siya mouyon sa baruganan ni Binay nga ang posisyon sa pagkabarangay ug SK officials ipaagi lamang sa appointment sa mapiling mga mayor sa usa ka local government unit.
Kini tungod kay ang synchronized barangay ug SK election nahipatik man sa Batakang Balaod sa nasud busa angayan kining pagatumanon.
Apan gihulagway ni Almendras nga susama kini og mibalik na sa panahon sa diktadoryong pamunuan ni kanhi presidente Ferdinand Marcos.
“Di ba ang atong 1987 Constitution produkto man sa Peoples Power, produkto sa pagpakigbisog sa kabataan sulod sa pipila ka tuig nga diktadoryang panahon, unya karon mobalik na hinuon ta,” sigon pa ni Almendras sa interbyu sa DyRF.
Dugang pa ni Almendras sama sa mga panahon ni Marcos daghang mga milagro ug anomaliya ang nahitabo sa pagtudlo sa mga barangay officials sa mga lungsod apan angayan nga ipadayon angmaong election aron ang mupili sa mga opisyales sa barangay mao ang katawhan. - BANAT NEWS