CEBU, Philippines - Usa ka tuig kapin nga batang lalaking masakiton ang giluwas sa kapolisan human giingong giabandonar sa inahan sa usa ka payag nga gihimong bodega sa uling diha sa Purok Tambis, sa barangay Omapad dakbayan sa Mandaue sa milabay’ng hapon.
Matud pa ni PO2 Joy Grengia sa Women’s and Children’s Desk sa Station 5 sa Mandaue City Police Office usa ka babayeng nagpakabana ang mitaho kanila mga alas 5:00 sa milabay’ng hapon ug nagpahibalong adunay usa ka batang lalaki nga giabandonar sulod sa bodega sa ulingan sulod na sa pipila ka adlaw.
Sa pagresponde nila ni PO2 Grengia ug mga kaubanan ilang naabtan ang bata nga nagpunay og hilak ug gipahigda lang sagol sa mga uling diha sa payag ug base sa kahimtang ug hitsura sa lawas niini aduna kini sakit ug malnourished gumikan sa kagutom.
Matud pa sa nakakita niadto pang milabay’ng Sabado petsa-7 ning bulana nakamatikod ang maong concerned citizen sa makaluluoy’ngkahimtang sa bata hinungdan sa pagtawag niini sa kapolisan.
Mitug-an ang saksi nga usa si Genalyn Meniano, legal, nga usa ka Guest Relation Officer (GRO) sa bar ang inahan sa maong bata apan wala na kini igkita pa sa kapolisan.
Ang bata gidali og dala sa kapolisan sa tambalanan sa Mandaue District Hospital ug gibalhin sa Eversely Child Sanitarium Hospital aron maatiman ug mabalik ang kahimsog niini.
Matud pa ni PO2 Grengia kasong kalapasan sa Child Abuse ug Abandonment ubos sa Akta Republika 7610 ang ilang ipasaka batok kang Meniano bisan kunkini nagtago-tago pa.
Ang bata itugyan sa kapolisan nganha sa Department of Social Welfare and Development (DSWD) kun maulian na sa maayong panglawas gikan sa tambalanan. – BANAT NEWS