CEBU, Philippines - Si Bokal Arliegh Sitoy sa ika-unom nga distrito mipasar og resolusyon nga nagpatawag sa opisyal sa usa ka beach resort sa lungsod sa Sogod aron pag-imbestigar sa pagkahanaw sa mga tuwalya atol sa gipahigayong duha ka adlaw nga consultative meeting ni Gob. Gwendolyn Garcia ug tanang mga sakop sa Hunta Probinsiyal.
Ang buot ipatawag ni Sitoy mao si Jessica Angeles, sales account executive sa Alegre Beach Resort sa lungsod sa Sogod.
Buot pakisayran ni Sitoy kun unsa ka tinuod ug pila usab ka mga tuwalya ang nawala sa mga room sa ubang mga board members.
Si Sitoy miingon nga iya usab sayran kun nganong ang iyang mga staff mao ray gitumbok ni Gob. Gwendolyn Garcia nga maoy nanghilabot sa maong butang. Giingong diha mapalgi ang maong mga tuwalya sa gireserbang lawak alang kang Sitoy nga giokupar sa iyang staff.
Sa iyang bahin, si Capitol consultant on information Rory Jon Sepulveda nagkanayon nga ang imbestigasyon ni Garcia kalabot niini ug sa pagpataka og parking sa drayber ni Sitoy ang ila una nga ihunong tungod sa aksyon sa Hunta Probinsyal. (BANATNEWS)