CEBU, Philippines - Ang nadakpang mamumuno sa pagbanhig sa usa ka engineer sa Department of Public Works and Highways sa 4th district nga gi-ambusan miangkong nasayop lang siya sa pagpusil tungod kay ang asawa unta maoy iyang target.
Ang suspetsado giila nga si Rene Garcia,30, kanhi trabahante sa DPWH nga gitaktak sa trabaho ug nagpuyo sa usa ka payag sa sitio Kalubihan sa barangay Talamban kagahapon sa buntag.
Ang operasyon gipanguluhan nila ni Criminal Intelligence Branch Supt. Pablo Labra II, ug Chief Insp. George Ylanan ug sa Homicide Section, Sr. Insp. Vicente Velasquez.
Nakuha kang Garcia ang usa ka kalibre .45 nga armas uban niini ang unom ka buhing bala, baby powder canister nga adunay lima ka buhing bala sa kalibre .45.
Si Sr. Supt. Patrocinio Comendador mibutyag nga ang tuyo ni Garcia mao si Engineer Dolores Salazar nga maoy Chief of Maintenance sa DPWH ug asawa sa biktimang si Engr. Ciriaco Salazar nga maoy namatay sa ambush.
Dugang ni Comendador nga ang suspetsado adunay kalagot ni Dolores kini tungod sa pasangil nga gitaktak siya niini sa iyang trabaho isip drayber.
Base sa report sa TV Patrol Central Visayas nga wala magduha-duha sa pag-angkon si Garcia sa iyang nabuhat nga krimen tungod sa kadako sa iyang kahiubos ngadto sa asawa ni Salazar nga si Dolores.
“Ngano man ko nga hate niya, buot gyud ko niya nga kulban og kaldero, maayo unta og gipasabot ko niya, diha-diha man dayun. Kun naa siya’y anak naa man sad koy akoa, duha,” matud pa ni Garcia sa maong report.
Midugang si Comendador nga ila pang ipaubos sa background check ang suspetsado kini human nangangkon nga wala siya’y laing krimeng nabuhat sa iyang kinabuhi.
Kahinumduman nga si Ciriaco Salazar, 49, gipusil patay niadtong Agosto 7 sa sitio Tigbao, Talamban pasado alas-7 samtang kini nagmaneho sa iyang Crosswind-Sportivo kauban ang iyang asawa padulong mouli. (BANATNEWS)