CEBU, Philippines - Usa ang patay samtang usa ka pasaheroang samaran sa dihang nadumbolan ang usa ka habalhabal sa kotse nga gimaneho og Koreano didto sa Highway Brgy. Basak dakbayan sa Lapulapu kagahapon sa kadlawon.
Ang namatay mao si Esmael Gelig Amodia, 35, minyo, residente sa sitio Ibabao, barangayBasak dakbayan sa Lapulapu ug usa ka habalhabal driver. Naangol usab si Eusebio Madrona Mabanto Jr., 23,ulitawo ug residente sa lungsod sa Liloan ug pasahero ni Amodia.
Ang nakadasmag kanila maoang kotse nga Nissan nga gimaneho ni Min Geon Kim, 22, minyo, usa ka Korean national nga temporaryong nagpuyo sa Pacific Villa sa barangay, Pajac dakbayan sa Lapulapu.
Matud pa ni PO1 Virgelio Ontong sa Traffic Division, nasayran nga mga alas 4:30 kagahapon sa kaadlawon samtang padulong si Amodia sa unang taytayan ngadto na sa dakbayan sa Mandaue uban sa iyang pasahero nga si Mabanto, samtang si Kim padulong kini sa Marigondon.
Base sa nakasaksi ang awto ni Kim kalit mi-overtake sa laing sakyanan sa pikas linya hinungdan nga nagkasugat sila sa motorsiklo nga gimaneho ni Amodia nadumbolan hinungdan sa pagkalagpot sa mga sakay niini. Si Amodia patay diha-diha dayon human kini nahiagom og daghang bali ug bun-og sa kalawasan.
Samtang si Mabanto nga nahiagom og mga samad ug bun-og sa kalawasan daling gidala sa Mactan Doctor’s Hospital ug kasamtangan na-admit sa maong tambalanan. Si Kim nga adunay gamay’ng samad sa iyang kalawasan uban sa iyang kauban nga Koreana nagpatambal usab sa tambalanan ug gisikop kini sa kapolisan.
Gipaubos si Kim sa liquor test kun dili ba kini hubog sa dihang nagmaneho sa iyang kotse. Matud pa ni PO1 Ontong, kasong reckless imprudence resulting to homicide ug physical injuries ang giandam nga kasong ipasaka batok sa maong Koreano.
Misaad si Kim nga abagahon ang tanang galastohan sa mga biktima ilabi na sa pagpalubong ni Amodia. (BANATNEWS)