CEBU, Philippines - Anggulo sa trabaho ang gitutokan sa kapulisan sa ilang imbestigasyon sa pagpusil patay sa engineer sa Department of Public Works and Highways nga si Ciariaco Salazar Jr. kinsa gi-ambush sa miaging gabii diha sa Talamban ning siyudad.
Si Sr. Supt. Patrocinio Comendador, hepe sa kapolisan sa dakbayan nagkanayon nga naa silay anggulo nga gisubay ug usa niini ang pagka-opisyal sa biktima sa Bids and Awards Committee sa Department of Public Works and Highways (DPWH) 4th Engineering district.
Si Salazar,49, molupyo sa Villa del Rio 1 barangay Bacayan, usa ka Engineer 3 sa DPWH 4th District nga nagbase sa lungsod sa Argao.
Ang mamumuno gihulagway nga duha ka lalaki nga nagsakay og motorsiklo nga kalit nga mitupad sa Isuzu Crosswind sa biktima kinsa kauban niadtong tungura ang iyang asawa nga si Dolores nga trabahante usab sa DPWH.
Sumala pa nga gisundan sa mga gikatahapan ang biktima ug dihang nakatapad kalit nga mipusil sa driver side hinungdan sa pagkaigo ni Salazar sa walang bukton nga milapos ngadto sa iyang dughan samtang ang asawa nga naglingkod tapad sa biktima naswertehan nga wala maigo.
Sila si Insp. Elizandro Quijano ug kaubanan diha sa Talamban police station nga maoy miresponde mao nay midala sa biktima sa North General Hospital apan gideklarar kini nga dead on arrival.
Sumala pa ni Comendador nga ilaha karong subayon ang mga proyekto nga gihuptan sa biktima ug kun si kinsa ang mga tawo nga nalambigit niini ug ingon man ang mga nakakomisyon.
Dunay usa ka team sa Cebu City Police Office ang gitahasan ni Comendador nga mosubay sa tanang impormasyon lakip na ang pag-back ground check sa biktima ug ingon man sa mga posibleng nalambigit niini.
Matud pang Comendador nga gisalikway una nila ang anggulo nga personal ang motibo sa pagpatay sanglit subay sa ilang nahipos nga kasayuran walay bisyo ang biktima.
Dako usab ang pagtuo sa kapolisan nga gun for hire ang mibanhig kang Salazar tungod sa kahanas nila paggamit og armas.
Kini maoy ikatulong higayon nga sunod-sunod ang pagpangambush dinhi sa dakbayan ug probinsya karun lang semanaha.
Matud pa niya nga segun sa ilang impormasyon upat na ka enhinyero sa DPWH ang gi-ambusan apan mao kini unang nahitabo sa dakbayan sa Sugbu.
Ang kapulisan makig-alayon usab sa mga empleyado sa DPWH alang sa pagpanguha og dugang impormasyon.
Nitataw si Comendador nga ang target gyud sa mamumuno mao ang biktima ug walay labot ang asawa niini sanglit ang pagpusil sa mamumuno tumong ra gyud sa driver side.
Pahimangno ni Comendador ngadto sa publiko ilabi na sa mga negosyante ug opisyal sa gobiyerno nga kinahanglan mangayo sila og security o ba kaha usbon ang pattern sa ilang agianan.
Tungod niining hitaboa, si Comendador mimando sa hepe sa Mobile Patrol Group (MPG) nga si Sr. Insp. Rex Campus nga tutokan na kadtong mga motorsiklo nga dunay angkas ilabi na kun mga lalaki.
Gimando usab ni Comendador ang pagpahingusog pa sa checkpoints dinhi sa dakbayan ilabi na sa mga hilit nga barangay nga maoy sagad daganan sa mga mamumuno.
Niadtong Lunes ang kanhi mayor sa lungsod sa Compostela nga si Joselito “Kokoy” Reynes giambusan didto sa barangay Estaca ug pagka Miyerkules sa gabii didto sa barangay Cabancalan usa ka negosyenteng babaye nga si Debbie Yu ug iyang driver nga gihulagway anaa sa kritikal nga kahimtang gi-ambusan sab sa duha ka tawo nga luwan og motorsiklo. – BANAT NEWS