CEBU, Philippines - Si kanhi City Anti-Indecency Board chairman Rene Joseph Bullecer nagtuong na-misinform si Cebu City Vice mayor Agustos Young kabahin sa gibasehan niining pamahayag aron motugot nga maka-operate ang lingam massage parlors dinhi sa dakbayan.
Matud pa ni Bullecer sa interbyu sa DyRF nga dakong sayop ang pagtuo ni Young nga ang lingam massage maoy usa sa mga alternatibong therapy aron maayo ang mga tawo nga may prostate cancer.
“Dili man mahimong hikapon ang prostate sa atubangan......kay kuotan man na sa anus kay tua man na sa ilawom niini,” sigon pa ni Bullecer kinsa unang nihulagway sa lingam massage nga “laing matang sa masturbation.”
Si Bullecer miingon nga ang katuyuan sa maong masahe diha aron pagpa-relax o therapy sa mga lalaki nga may prostate cancer kun dili “arousal nga makapa trigger og laing reaksyon” nga mao ang pagpakighilawas.
Miasoy si Bullecer nga may gisugo sila kaniadto nga mga police decoy sa CAIB sa pagsulod sa mga massage parlor dinhi sa Sugbu aron magpa- lingam massage ug namatud-an niini nga aduna gyuy sex nga mahitabo sa sulod.
Gihulagway usab niining ang mga lawak baho, banha ang music ug aso conducive kaayo sa prostitution kay "mura kini og anaa sa langit."
Dugang pasabut niini nga ang maong matang sa masage unang nasikat ngadto sa Thailand diin nabaniog niadtong higayona ang maong nasud nga sex capital tungod kay sa daghang mga masahistang motanyag og sex ug ang mayoriya sa mga trabahante niini may Human Immunodeficiency Virus(HIV). – BANAT NEWS