CEBU, Philippines - Nadakpan sa kapolisan sa lungsod sa San Fernando pasado alas 10 sa miaging gabii sa sitio Lakaron, barangay Pitalo ang usa sa duha ka gitumbok nga suspetsado sa pagpusil patay sa magtutudlo sa Tubod National High School sa Minglanilla niadtong milabay’ng buwan.
Ang nadakpan mao si Maximo “Imuk” Tanudtanud, 29, dunay kapuyo nga taga barangay Balungag sakop sa nahisgutang lungsod human kini maatli sa grupo ni SPO1 Deogenes Carrillo ug mga kaubanan.
Nakuha kaniya atol sa pagrekisa ang usa ka .357 revolver ug duha ka pakete nga gituuhang may sulod nga shabu.
Si Sr. Supt. Erson Digal, hepe sa kapolisan sa lalawigan nagkanayon nga si Tanudtanud maoy drayber sa motorsiklo nga getaway vehicle dihang gipusil patay sa kauban niini si Serafin Villahermosa sulod sa Tubod National High School.
Matud ni Digal nga ila na usab nailhan ang kauban ni Tanudtanud nga nipusil patay kang Villahermosa.
Si Tanudtanud hugtanong mihimakak sa pasangil ug nagkanayon nga wala gyud siya makahibawo ug makaila sa magtutudlo nga gipatay sanglit atol nga gipatay ang biktima didto siya sa barangay Balungag.
Apan iyang giangkon nga usa siya sa mitulis sa magtiayon nga bag-ohay lang nahalinan og kabaw ug sa paglungkab sa usa sa mga balay sa Balungag niadtong milabay’ng buwan.
Iyang gitug-an nga usa ka Joel Quinia ang iyang kauban sa pagtulis sa magtiayon ug ang kwarta nga P56 mil ilang gisuroy-suroy dinhi sa dakbayan pinaagi sa pagpangabang og babaye ingon man pagpanugal kutob sa ilang maagian.
Matud ni Digal nga makapila na mabilanggo si Tanudtanud sa Cebu Provincial Detention and Rehabilitation Center (CPDRC) tungod sa kasong frustrated murder ug lungkab.
Si Chief Insp. Resty Santos hepe sa Minglanilla Police Station miingon nga positibong gitumbok si Tanudtanud sa mga witnesses nga maoy drayber sa motorsiklo atol nga gipusil si Villahermosa, gikatahong dugay nag-estambay ang duha sa gawas sa wala pa patya si Villahermosa.
Gihulagway ni Digal nga maoy tirador si Tanudtanud diha sa San Fernando. Si Sr. Insp. Carlos Reyes, hepe sa San Fernando Police station nagkanayon nga dugay na nilang gisunod-sunoran ang kalihokan ni Tanudtanud ug sa grupo niini.
Niadtong miaging gabii, matud ni Reyes nga nakadawat siya og impormasyon gikan sa usa ka concerned citizen nga si Tanudtanud mianha sa barangay Lakaron hinungdan ila kining girespondehan. – BANAT NEWS