CEBU, Philippines - Natuhab ang bukobuko sa usa ka bayong-bayong human kini dunggaba sa wala hiilhing kriminal didto sa sitio Mulle Osmeña, barangay Poblacion, dakbayan sa Lapulapu sa miaging gabii.
Ang biktima nailhan nga si Genalo Mares, 17, nga taga barangay Agus sa maong dakbayan.
Matud pa ni SPO2 Ernesto Francisco sa homicide section sa kapolisan sa Lapulapu nga naglakaw sa karsada ang biktima kuyog sa mga higala niyang babaye dihang kalit lang gihansakan sa kutsilyo ang iyang bukobuko sa wala hiilhing mamumuno.
Sumala ni SPO2 Francisco nga human sa maong pagpanunggab mikabad dayon og dagan pahilayo sa maong lugar ang kriminal apan wala gyud mailhi sa grupo sa biktima.
Gihatod dayon ngadto sa Opon District Hospital ang biktima samtang gipangita sa kapolisan ang kriminal kinsa gituohan sa mga otoridad nga miparegla sa biktima. (BANATNEWS)