CEBU, Philippines - Usa ka dalaga gidagit sa duha ka wala mailhing lalaki samtang kini nagtubag sa sugo sa lawas diha sa kalibunan sa UN Avenue sa barangay Omapad dakbayan sa Mandaue sa milabay’ng gabii.
Ang gidagit mao si Katrina (tinuod nga ngalan gipugngan) 18, dalaga ug empleyado sa Mactan Export Processing Zone ug residente sa barangay Paknaan dakbayan sa Mandaue.
Base sa imbestigasyon ni PO2 Joy Grenhia sa Women’s Desk sa kapolisan sa Station 5 sa Mandaue City Police Office nasayran nga nakig-date si Katrina sa milabay’ng gabii sa iyang uyab nga si Bryl Navarez, 20, taga barangay Alang-alang dakbayan sa Mandaue niadtong higayona.
Giingong kalit nga mibundak ang kusog nga ulan sa maong dapit maong mipasilong sila sa usa ka skywalk apan pipila ka gutlo ang milabay, si Katrina nananghid kay kaihion kini hinungdan nga milipot kini sa luyo nga bahin sa Omapad Elementary School.
Sumala pa ni PO2 Grenhia nadunggan na lang ni Navarez ang singgit sa uyab kay adunay mibunlot kaniyang duha ka wala mailhing mga lalaki hinungdan nga daling gisusi ni Navarez ang gikahimutangan sa uyab.
Apan nakugang na lang si Navarez dihang gisugat siya sa usa ka lalaking nagbitbit og kutsilyo hinungdan midagan nalang siya ug nangayo og tabang diha sa usa ka gasoline station sa maong dapit.
Sa pagresponde sa kapolisan sa Station 5 wala na maabti ang mga suspetsado sa maong lugar ug nahibilin na lang ang purol ni Katrina nga nahubo sa maong dapit.
Kagahapon sa buntag nakugang ang kapolisan sa dihang miabot sa Station 5 si Katrina ug mipadayag nga gibuhian siya sa midagit kaniya human kini mihangyong dili siya pasipad-an.
Sa pakighinabi sa Banat News, si Katrina miasoy nga wala siya lugosa sa duha apan miangkon kining gipasulod sa usa kanila nga midagit kaniya ang tudlo niini sa iyang kinatawo.
Matud pa ni Katrina nga iya usab nasayran nga usa ka drayber sa traysikol ang midagit kaniya ug ang usa panday (mga ngalan gipugngan sa Banat News gumikan sa nagpadayong hot pursuit operation sa kapolisan). Ang mga nanagit pulos mga residente usab sa Omapad.
Sumala pa ni Katrina nga gidala siya sa usa ka payag ug gumikan kay nahibilin ang purol niini ug nabasa siya sa ulan gihatagan siya og purol sa usa sa mga nanagit.
Matud ni PO2 Grenhia kasong pagpanglugos gihapon ang atubangon sa duha ka suspetsado kun ila kining masikop gumikan sa paghilabot nila sa kinatawo sa biktima, samtang ila usab ipahiling sa pink room sa VSMMC si Katrina sa pagsiguro kun wala ba gyud kini mahilabti sa mga nanagit.
Si Navarez mibutyag nga bisan pa sa nahitabo sa iyang uyab iya gihapon kining panggaon ug mahalon ug dili angayan nga isalikway ilabi na nga anaa kini sa makaluluoy nga sitwasyon. (BANATNEWS)