CEBU, Philippines - Nagplano si Bise Mayor Joy Augustus Young nga moduso og bag-ong guidelines nga ipaubos sa psychological test (PT) ang mga scholar sa gobyerno apan giklaro niya nga unya na kini moepekto sa mga mograduwar sa high school sa sunod tuig.
Matud pa sa bise mayor nga gusto niyang makapasar sa PT ang tanang mograduwar sa high school sa mga pampublikong tunghaan aron masuta kung unsa ang haom nga kurso niini sa higayong mograduwar na sila.
Sa pagka-karon, ang siyudad dunay 5,000 kapin ka mga scholar gikan sa 8,500 nga migradwar sa high school niadtong Marso.
Gipaabot nga moduble na ang gidaghanon niini sa sunod tuig busa gipaniguro sa bise mayor nga pakusgon ang maong programa.
Gusto usab ni Young nga susihon ang mga unibersidad nga tunghaan aron masuta kung may katakus kini nga makahatag sa de kalidad nga edukasyon alang sa mga scholar.
Kahinumdoman nga ang maong proyekto gisugdan niadtong Marso niining tuiga diin dunay tag P10 mil nga scholarship grant nga gihatag sa dakbayan alang sa mga high school graduate.
Matud pa ni Young nga nindot kaayo kun ang kursong kuhaon sa mga scholar magamit gyud nila inig-graduwar nila, busa kinahanglang mag-agi sila og guidance counseling aron mahibaw-an kung asa kutob ang ilang makaya, nagkanayon si Young.
Samtang sa laing bahin gibutyag ni Young nga miuyon na si Kalihim Armin Luistro nga ang kagamhanan sa dakbayan sa Sugbo mao nay mohimo sa program of works and estimates (POWE) sa mga eskuylahang tukoron dinhi sa dakbayan.
Kini tungod kay gipasabot niya ang kalihim nga mas maayong ang kagamhanang lokal mao nalay mopatukod sa tulunghaan apan ang kuwarta manukad sa panudlanan sa DepEd Manila aron makabarato sa gastohanan.
Kini tungod kay kun ang DepEd Manila maoy mopatukod sa mga edipisyo sa eskuylahan, mahal kaayo ang costing niini busa dali kaayong mahibos ang panudlanan sa DepEd, matud pa ni Young. (Uban sa report Jean Rien Armenion PIT Intern) (BANATNEWS)