Kawani sa DILG ipa-drug test

CEBU, Philippines – Ang Department of Interior and Local Government (DILG)7 mopahigayon og surprise drug testing ngadto sa mga kawani sa DILG ug sa uban pang mga kaubang ahensya niini.

Kini human masikop si Kongresista Ronald Singson nga anak ni Gobernador Chavit Singson sa Ilocos Sur, didto sa Hongkong gumikan sa pagpayuhot niini og cocaine.

Matud pa ni Regional Director Pedro Noval sa DILG 7 nga wala siya mahimuot kay alang kaniya usa ka dakong sagpa sa nasud ang pagkasikop ni Singson didto sa gawas kay siya usa ka dakong opisyal sa kagamhanan sa Pilipinas.

Nagtuo si Noval nga mahanaw lamang ang pagduda nga dunay daghan pang mga opisyales sa nasud nga nalambigit sa pagnegosyo og ginadiling drugas kun iyang ipahigayon ang surprise drug testing sa tanang mga kawani sa DILG sa Central Visayas.

Ilakip usab niining kinalit nga drug testing sa DILG ang ubang ahensiya sa kagamhanan sama sa mga sakop sa Philippine National Police, Bureau of Fire and Protection ug uban pa.

Dugang pa niya nga mas maayong makita sa publiko nga ang kapolisan ug mga opisyales sa Central Visayas mahimong ehemplo sa dili tigamitan og ginadiling drugas ug wala usab nalambigit sa sindikato sa illegal nga drugas. (BANATNEWS)

Show comments