CEBU, Philippines - Ang Department of Agriculture-7 (DA-7) mibutyag nga ang lima na ka lungsod ug usa ka siyudad sa amihanang bahin sa lalawigan sa Sugbu ang grabeng naapektohan sa pag-atake sa peste nga gitawag og army worms ngadto sa kamaisan ug ubang tanaman.
Sumala pa ni George Paculba, ang rice coordinator sa DA-7, nga ang tanang umahan sa mais sa lungsod sa Bantayan, Santa Fe ug Madridejos nahurot gyud sa pag-atake sa army worms.
Naapil usab sa giatake sa peste ang mga kaumahan sa lungsod sa San Remegio, Tabuelan ug dakbayan sa Bogo.
Samtang sa probinsiya sa Negros apektado usab ang kaumahan sa lungsod sa Siaton ug Santa Catalina.
Hinuon gipahibawo ni Paculba nga kontrolado na ug wala nay kabalak-an pa ang maong problema sanglit ang DA mipahigayon dayon og pagpang-spray og chemical uban sa mga lokal nga pangagamhanan sa naapektohan lugar.
Apan gumikan sa maong mga peste mihunong una sa pagpananom ang mga mag-uuma sanglit aduna pay mga nahabiling mga peste sa pipila ka mga dapit bisan nga gibombahan na og medisina.
Gipaabot nga karon pang sunod bulan o ba kaha sa bulan sa Septiyembre pa sila makabalik sa pagpananom.
Gipahibawo usab ni Paculba nga may 80 ka hektaryang kahumayan sa Tanjay, Negros Oriental ang gihugpaan og Tungro Virus, usa ka matang sa sakit sa tanom nga gidala pinaagi sa hangin.
Samtang gitug-an ni Paculba nga nakadawat sila og report nga may kahumayan usab sa dakbayan sa Carcar nga gihugpaan niini apan ang ilang buhatan nagpadayon pa sa pagkompirma sa maong report. – BANAT NEWS