CEBU, Philippines - Nalandig sa tambalanan ang usa ka 29-anyos nga lalaki human kini pusila sa usa ka giingong ex-convict didto sa sitio Galaxy, barangay Tanke, dakbayan sa Talisay niadtong Miyerkules sa gabii.
Ang biktima mao si Winlobe Villoria, taga barangay Dumlog sa nahisgutang siyudad samtang ang suspetsado giila lang sa ngalang “Harold” walay klarong address.
Si PO1 Jundave David sa Talisay City Police Office kinsa maoy nag-imbestigar sa maong hitabo nagkanayon nga base sa iyang nahipos nga report si Harold usa ka ex-convict apan walay nasayod sa address niini. Sayo niini si Villoria gikang mitambong og party sa sitio Galaxy ug paingon na unta kining mouli sakay sa iyang motorsiklo dihang giluthang kini sa suspetsado.
Ang biktima kinsa nasabak sa walang abaga gihatod dayon ngadto sa hospital sa Talisay apan gibalhin kini sa Vicente Sotto Memorial Medical Center sa dakbayan sa Sugbo samtang ang suspek gipangita pa sa kapolisan human kini mosibat human makapusil. – BANAT NEWS