CEBU, Philippines - Namatay ang usa ka 45-anyos nga lalaki gumikan sa pagkabuak sa agtang niini human mapantok sa bato kay natagak sa ilang hagdanan didto sa Sitio Tomoy, barangay Ibabao, lungsod sa Cordova kagahapon sa alas 7:30 sa buntag.
Ang namatay mao si Jose Ngujo Bentolan, 45 , ulitawo, nga taga Ibabao.
Si PO2 Manfred Maarat sa Cordova Police Station mibutyag sa Banat News nga gahi na ang patay’ng lawas sa biktima dihang nakit-an kini sa iyang silingan kay nagpuyo kining nag-inusara sa iyang balay.
Matud pa ni PO2 Maarat nga namatikdan sa mga silingan ang biktima niadtong Martes sa gabii nga gisakitan kini og tiyan ug gituohan nilang nanaog kini dihang natagak sa iyang hagdanan nga may upat ka tiil ang gitas-on ug napantok ang ulo sa bato nga maoy hinungdan sa pagkabuak sa iyang agtang ug namatay.
Hinuon kombinsido ang mga kabanay nga wala tuyoa og patay ang biktima busa wala na kini ipa-autopsy. – BANAT NEWS