CEBU, Philippines - Imbestigahon sa Cebu City Police Office (CCPO) ang usa ka polis nga kanhi nadestino sa dakbayan sa Sugbu apan nadestino na sa dakbayan sa Mandaue kun nganong ang iyang PNP ID nakit-an sulod sa bag sa dinakpan nga gipasanginlang mastermind sa mga pagpatay sa dakbayan sa Carcar ug giingon usab nga drug pusher nga si Jay Camotes.
Si Sr. Supt. Patrocinio Comendador nagkanayon nga gimandoan na niya ang Theft and Robbery Section (TRS) nga imbestigahon si kanhi SPO2 Ricardo Albotra.
Matud ni Comendador kun unsa may resulta unya sa imbestigasyon batok kang Albotra iyaha kining iduso ngadto sa pangulo sa PRO-7 nga si Chief Supt. Lani-O Nerez kinsa mao nay mohukom unsay lakang niini sa ilang rekomendasyon.
Gitug-an ni Comendador nga sa iyang pag-abot sa CCPO niadtong 2007 na-dismiss sa serbisyo si Albotra apan pagka 2008 na-reinstate kini og balik ug nadestino diha sa CCPO una pa kini gibalhin ngadto sa kapolisan sa dakbayan sa Mandaue.
Kaduha nga mi- AWOL (Absence Without Official Leave) si Albotra nga posibleng maoy sukaranan sa iyang pagka-dismiss sa serbisyo sa PNP kaniadto.
Wala pa hinuon matino sa kapolisan kun nganong naa sa bag ni Camotes ang I.D ni Albotra apan nagtuo si Comendador nga posibling dunay link ang duha.
Wala hinuon malilong nga si Camotes level two drug pusher sa dakbayan sa Carcar ug gani anaa siya sa ikaduhang listahan sa law enforcement units gumikan niini. (BANATNEWS)