CEBU, Philippines – Gumikan sa wala pagkasinabtanay, usa ka 32-anyos nga lalaki ang misuway og patay sa iyang pangasaw-unon pinaagi sa paglumos niini ug pagkahuman mipasok sa iyang kaugalingon ulo sa usa ka lungag sa bato ilawom sa dagat ug namatay.
Kini nahitabo kagahapon alas-2 pasado sa hapon diha sa dagat sa sitio Paraiso sa barangay Buaya, dakbayan sa Lapulapu diin magpuyo ang duha.
Ang namatay mao si Rico Cañan, lumad nga taga Mindanao kansang ulo naungot ilawom sa bato ug nalumos samtang ang hinigugma niining buot unta niyang patyon giilang si Ronafe Suerto, 19, nagpuyo sa maong dapit.
Matud pa ni PO1 Leo Torres sa kapolisan sa Presinto 2 sa Lapulapu Police Station dihang nakahinabi sa Banat News nga si Cañan ug Suerto gikatakda na untang kaslon sa sunod buwan.
Hangtud ning pagsuwat sa balita wala pay klarong kasayuran ang kapolisan kun nganong misangpot sa maong hitabo ang relasyon sa duha apan nagtuo silang posibleng may bug-at nga suliran ang duha ug buot sa lalaki nga mag-unongay silang duha sa kamatayon.
Sumala pa ni Torres nga nangadto ang duha sa baybayon dili layo sa ilang balay ug kalit lang namatikdan nga nagkatinubagay ang duha ug nakit-an alang ilang naglinayogay ug giguroy ni Cañan si Suerto padulong sa dagat.
Misunod dayon niini ang pagduot ni Cañan sa ulo ni Suerto diha sa dagat nga susama og gilumsan hinungdan nga mikisi-kisi ang babaye.
Ang amahan ni Suerto nga si Norberto kinsa nakakita sa gibuhat sa umagaron ngadto sa iyang anak daling midagan sa lapyahan ug misuway og luwas sa iyang anak apan gisugat siya niini og sukmag sa iyang nawong.
Sumala pang Torres maayong pagkalukapa ni Norberto diha sa balas ug natuto ang nawong.
Diha-diha giingong mihunong na sa pagkisi-kisi ang dalaga hinungdan nga gibuhian kini ni Cañan ug nagtuong nalumos na gyud kini. Diha-diha misawom sa mas lawom nga bahin sa dagat og gipasok iyang ulo sa usa ka buslot sa bato.
Ang mga silingan nga nagtapok sa nahitaboan daling mitabang sa duha apan giingong miungot ang ulo ni Cañan diha sa bato ug naglisod sila paghaw-as niini.
Ang mirespondeng mga sakop sa Emergency Rescue Unit Foundation nga adunay mga ekipo mao nay nakatangtang sa ulo ni Cañan diha sa bato apan patay na kini samtang gidala sa tambalanan si Suerto ug luwas na ang kahimtang apan dili pa makatingog. (BANAT NEWS)