CEBU, Philippines - Duha ka mga lalaki ang nabiktima sa pagpamusil ug namatay sa dakbayan sa Sugbu niadtong Miyerkules sa hapon ug gabii.
Unang gipusil patay mao ang usa ka electronic technician nga si Jose Sebredo,35, diha sa sitio Ilang –Ilang barangay Sawang Calero dakbayan sa Sugbo.
Samtang ang suspetsado mao si Patrick Leyson residente usab sa maong lugar.
Base sa imbestigasyon sa kapolisan nga gipangunahan ni PO2 Judan Batucan, ang asawa sa biktima mibutyag nga nagbarog ang iyang bana sa ilang tindahan dihang kalit nga gipusil sa suspek.
Ang biktima nakaangkon og mga samad pinusilan sa tuong bahin sa iyang liog ug sa iyang bukton nga nakaingon sa kamatayon niini. Ang suspek daling nakaikyas human sa hitabo.
Sa pakighinabi sa Banat News ni Batucan giingong nagkabikil ang duha gumikan kay ang suspetsado maoy gipasanginlang mi-karnap sa motorsiklo sa biktima kaniadto.
Laing gipusil ug namatay pagkagabii niadtong Miyerkules mao ang usa ka wala mailhing lalaking gibana-banang 5’4 ang height, kuloton ang buhok, tabunon ang pamanit ug nagsuot og itom nga polo shirt ug maong nga karsones.
Ang biktima gipusil patay pasado alas 9:15 Miyerkules sa gabii diha sa Quezon Blvd. sitio Bato barangay Ermita apan padayon pang gipangita sa kapolisan ang mamumuno.
Base sa imbestigasyon sa Crime Scene Investigation Unit nga gipangunahan ni SPO2 Sylvanus Abella nga tulo ka buto-buto sa armas ang nadunggan sa mga tanod ug pipila ka gutlo nakit-an nalang nila ang biktima nga nagdagan nga samaran ug nahagba.
Ang biktima nakaangkon og mga samad pinusilan sa dughan ug sa walang bahin sa iyang lawas nga miresulta sa iyang kamatayon. – BANAT NEWS