CEBU, Philippines - Wala imbitaha ni Gob. Gwendolyn Garcia sa gipatawag niining consultative meeting sa mga sakop sa Hunta probinsiya karong Hulyo 31 hangtud sa Agusto 1 adlaw nga Sabado ug Domingo si Bise Gob. Gregorio Sanchez.
Gipasabot ni Garcia nga dili ang politikanhong panagbingkil ang hinungdan kundili tungod kay si Sanchez wala may komitiba nga gihuptan sa Hunta.
Matud pa sa gobernadora nga dili na kinahanglang paapilon sa maong tigum si Sanchez sanglit mga sakop sa hunta probinsiyal ang iyang konsultahon ug walay labot ang presiding officer nga si Sanchez.
Sa mao unya nga tigum ang gobernadora mopakita sa tanang mga accomplishment sa Kapitolyo sulod sa unom niya ka tuig ilabi na sa iyang gipatuman nga 10-point agenda aron magiyahan ang mga provincial board.
Si Garcia nagkanayon nga pinaagi sa maong consultative meeting iyang mahibaw-an kun unsay matampo ug ikatabang sa provincial board members alang sa pagpatuman sa mga proyekto nga iyang gitinguhang humanon sulod niining iyang katapusang termino sa pagkagobernador.
Dugang pa sa gobernadora nga mao kini ang usa sa hinungdan nga wala siya magpapili sa bisan unsang posisyon sa League of Provinces of the Philippines tungod kay buot siyang mopunting sa tanan niyang atensyon sa kahingpitan giplanong proyekto sa Kapitolyo alang sa katawhan sa lalawigan sa Sugbu sa dili pa mapupos ang iyang tulo ka termino sa pagka-gobernador sa probinsiya. (BANAT NEWS)