CEBU, Philippines - Wala na makaabot nga buhi diha sa tambalanan ang kapitan sa barangay Lawaan I, dakbayan sa Talisay human kini gidudahang giatake sa sakit sa kasing-kasing niadtong Lunes sa alas 10:10 sa gabii.
Ang namatay mao si Kapitan Jerson Laceda kinsa magsaulog sa iyang ika-52-anyos nga birthday karong Hulyo 22, 2010, usa ka negosyante nga mamalit og mga scraps.
Ang manghod ni Laceda nga si Deborah nga nahinabi sa DYAB-Abante Bisaya kagahapon mibutyag nga ang kapitan naghambin og sakit nga toxic goiter, heart enlargement ug diabetic ug naandan na niini mo check-in og hotel aron magpahuway sa iyang kakapoy tungod sa kadaghan sa iyang trabaho. Niadtong Hulyo 18, 2010 ang kapitan mi-check in sa usa sa mga hotel sa dakbayan sa Sugbo ug paingon na unta kining mo-check-out apan nanawag sa room boy nga magpahatud ngadto sa Chong Hua Hospital kay naghuot iyang dughan.
Apan human mahatud sa Emergency Rescue Unit Foundation gideklarar kining patay na.