CEBU, Philippines - Kusganong gipanghimakak sa Kapitolyo nga ang anak sa gobernadora nga si Paolo Garcia nanghilabot sa paghatag og supply sa armas ngadto sa kapolisan sa lalawigan sa Sugbu.
Sumala pa ni Capitol Consultant on Information Rory Jon Sepulveda nga ang anak ni Gob. Gwendolyn Garcia dili mao ang tig-suplayan og armas sa kapolisan sa lalawigan sa Sugbu sigon sa pagduda sa mga kaatbang sa politika.
Matud pa ni Sepulveda nga dili konektado si Paolo sa lalawigan sa Sugbu tungod kay pribado ra kining tawo ug labaw nang dili kini makabuot kun unsang mga armas ug ubang mga gamit ang angayan nga paliton sa kagamhanan sa lalawigan sa Sugbu aron ihatag ngadto sa Cebu Provincial Police Office kon CPPO.
Hinuon miingon si Sepulveda nga si Paolo igo lang mohatag og "unsolicited advice" sa iyang inahan labot sa mga armas, uniform ug uban pa tungod kay mao man kini ang “field of interest” ni Paolo nga pareho sa hilig ni kanhi Capitol Consultant on Security Matters Byron Garcia, apan ang gobernadora gyud maoy magbuot sa tanan.
Si Sepulveda nagkanayon nga ang anak sa gobernador dili usab makapanghilabot sa transaksyon sa Kapitolyo may labot sa mga pagpalit og mga armas alang sa kapolisan tungod kay ipaagi gihapon kini og bidding. Apan ang tanang mga hinabang gikan sa Kapitolyo mag-agi sa buhatan ni Capitol Consultant on Peace and Order retired Col. Ceasar Veloso una pa maabot sa buhatan sa gobernador. – BANAT NEWS