CEBU, Philippines - Gitinguha karon sa operator sa V&JA Bus Liner sa Corominas Bus nga ilibkas na sa Land Transportation Franchising and Regulatory Board (LTFRB-7) ang 30 ka adlaw nga pagsuspenso sa operasyon sa ilang mga sakyanan.
Ang abogado nga si Atty. Edmund Villanueva mipasabot nga nahatag na nila ang tag P60 mil nga death indemnity ngadto sa mga pamilya sa mga namatay sa aksidente sa Das Landing, barangay Lutopan, dakbayan sa Toledo nga mikalas og 15 ka kinabuhi ug daghang pasahero ang naangol.
Hinuon, matud ni Villanueva nga sa 15 ka mga biktima 14 pa ang nahatagan sa hinabang pinansiyal kagahapon tungod kay ang nahabiling usa niini padayon pa usab nga naghikay sa mga dokumento niini.
Nunot niini, gitinguha karon sa operator nga si Dulce Gantuangco nga iduso ngadto kang LTFRB-7 director Benjamin Go ang mga dokumento paghatag kanila og mga hinabang pinansiyal aron mao kini basehan sa ilang paghangyo nga tugotan na silang makabalik sa ilang operasyon.
Nasayran nga pabiling grounded ang nahabiling lima ka sakyanan sa V&JA bus human sa trahedya samtang gipaubos pa sa eksaminasyon ang mga drayber niini ug gipaubos usab sa road worthiness test ang mga sakyanan niini.
Ang V&JA bus mikabit kini sa linya sa Corominas bus nga dunay lainlaing operator.
Nasuta sa imbestigasyon sa kapolisan nga ‘human error’ ang hinungdan sa aksidente sa Lutopan. (BANATNEWS)