CEBU, Philippines - Gihulagway ni kanhi senador John Henry “Sonny” Osmeña ang wala pagsinabtanay nila ni Cebu City Mayor Michael Rama ug Cebu City south district Kong. Tomas Osmeña nga dili maayong tilimad-on.
Mipadayag dayon ang kanhi senador nga ipa-recall si Rama human sa usa ka tuig nga paglingkod niini sa pagkamayor sa siyudad sa Sugbu.
Sa interbyu sa DyRF, si Osmeña nagkanayon nga sa higayon nga matuman ang recall election iyang padaganon si Tomas Osmeña aron makabalik kini sa pagkamayor sa siyudad sa Sugbu.
Matud pa niini nga ang pagsaway ug pagsugyot sa kanhi mayor nga pabiling transparent si Rama tilimad-on nga wala mahimuot ang kanhi mayor.
Si Rama mipagawas og gag order ngadto sa mga department heads sa city hall nga dili magpataka og tubag sa media kun wala masayod sa ilang ipanulti o isyu.
Ang kanhi senador nagkanayon nga wala gyud siya masayop sa iyang mga panagna nga layo ra ang unom ka bulan makabikil ni Rama si Tomas.
“Ang akong ikatambag kaniya (Tomas Osmeña), human sa usa ka tuig nga paglingkod ni Mike, mahimo natong ipa-recall si Mike aron makabalik si Tomas sa pagkamayor. Ang remedyo diha mao nga ipa-recall (si Rama). Akoy mo-file og recall batok kang Rama,” sigon pa sa kanhi senador.
Matud pang Sonny O. mahimong rason sa pagpa-recall ang usa ka opisyal kun wala nay salig kaniya ang katawhan. (BANATNEWS)