CEBU, Philippines - Mipasaka si Bise Gob. Gregorio Sanchez og kasong writ of mandamus, damages and prohibition batok kang Gob. Gwendolyn Garcia tungod sa pagdumili sa naulahi pag-renew sa kontrata sa siyam ka mga consultant ubos sa iyang buhatan.
Sigon sa report si Sanchez mipasaka sa maong mga kaso batok kang Garcia ngadto sa Ombudsman Visayas pinaagi sa iyang abogado nga si Atty. Oliveros Kintanar.
Si Kintanar nagkanayon nga gawas sa gobernadora giapil usab nila sa gipasakaan og kaso sila si Provincial Atty. Marino Martinquilla, Provincial Administrator Eduardo Habin ug Capitol Consultant on Information Atty. Rory Jon Sepulveda.
Sumala pa ni Kintanar nga walay basehanan ang pagdumili ni Garcia sa pag-renew sa kontrata sa mga consultant sa bise gobernador tungod kay ang gahin nga gigamit sa pagbayad sa mga suhulan sa mga consultant ubos sa buhatan ni Sanchez ug dili sa pundo sa buhatan sa gobernador.
Iyang gipasabot nga ang pundo alang sa mga consultant ni Sanchez nagagikan sa Legislative Assistant Fund kon LAF ubos sa office of the vice governor busa dili makapanghilabot si Garcia sa kontrata sa maong mga consultant.
Subling gipasabot niini nga walay katungod ang gobernadora sa pagkontrolar sa LAF tungod kay sigon sa annual budget sa Kapitolyo alang niining tuiga ang maong pundo gitagana ubos sa mga Sangguniang Panlalawigan nga gipangulohan ni Sanchez busa siya lamang ang may katungod sa pag-release niini ug dili ang gobernadora.
Gipasabot niini nga naapil sa ilang kiha sila si Martinquilla, Habin ug Sepulveda tungod kay mao man kini ang mga nag-review sa mga kontrata sa mga consultant sa bise gobernador ug maoy mirekomendar nga dili sila i-renew.
Gipangayo niining did-an ang gobernadora ug mga kaubanan sa pagpanghilabot sa kontrata sa mga consultants sa bise gobernador lakip na ang pagbayad sa danyos sa pagkaputol sa kontrata sa naasoy nga mga kawani ni Sanchez. - BANAT NEWS