CEBU, Philippines - Wala nay kinabuhi nga napalgan ang usa ka tawo kinsa naanod sa sulog ug nalumos sa sapa sa sitio Lapyahan, sa barangay Labogon, dakbayan sa Mandaue sa miaging adlaw.
Si Inspector Ramil Morpos, hepe sa Investigation Detection and Management Bureau sa Mandaue City Police Office miila sa namatay nga si Roger Soon, 45 , minyo nga taga Labogon.
Matud pa ni Inspector Morpos nga milabang ang biktima sa nahisgotang suba gikang nanginhas kuyog ang 8 anyos nga batang lalaki nga nailhang si Maynard Cobarde.
Samtang gisung-ay ni Soon ang bata, giingong kalit kining nadakin-as sa labanganan hinungdan nga natumba kini ug naanod sa sulog sa sapa .
Midugang si Inspector Morpos nga naalinggatan sa mga tawo ang hitabo human mabati ang singgit sa bata nga nangayo og panabang.
Gipangita dayon nila si Soon apan wala na nila kini makita, unya pipila ka oras ang milabay, milutaw na kini nga wala nay kinabuhi. – BANAT NEWS