CEBU, Philippines - Mikabat sa P13,000 ang kantidad sa salapi nga natulis sa tulo ka mga armadong tawo gikan sa usa ka gasolinahan sa sitio Datag, barangay Maribago, sa dakbayan sa Lapulapu sa miaging kaadlawon.
Si PO3 Elmer Canillo sa Theft and Robbery Section sa Lapulapu City Police Office miila sa nabiktimang gasolinahan nga mao ang Shell Gasoline Station nga gipanag-iya sa negosyanteng si Manuel Saenz sa maong dakbayan.
Sumala ni Canillo nga ang mga tulisan nagsakay og usa ka XRM nga motorsiklo nga kolor itom nga nagpatubil og gasolina nga bali og P100.
Unya usa sa tulo ka tawo miduol kang Antonio Gumunit, ang kahero sa gasolinahan niadtong tungora ug nakurat nalang ang naulahi kay imbis nagtuo siyang tunolan siya og bayad, sumbohan man hinuon sa armas de fuego maoy gition kaniya ug mideklarar nga tulis.
Samtang ang guwardiya usab sa maong gasolinahan nga si Johnrey Manliquis, hingkod, wala usab makalihok kay gitionan man usab siya og armas sa laing tulisan.
Sa kabalaka patyon siya, gitunol nalang ni Gumunit ang P13,000 nga iyang halin niadtong tungora nga diha sa iyang kaha. (BANATNEWS)