CEBU, Philippines - Patay na nga napalgan nga nagbuy-od sa daplin sa dalan ang usa ka piyado sa kalubihan ug nag-atubang og kaso gumikan sa pagpamutol sa mga lubi nga iyang gibantayan, nga gituohang naghikog pinaagi sa pagpusil sa iyang dughan didto sa sitio Palo Maria, Lower Matinamahoan, lungsod sa Carmen sa miaging kaadlawon.
Si SPO2 Renerio Masucol, imbestigador sa Carmen Police Station nga nahinabi sa Banat News miila sa namatay nga si Teresito Quingco, 53, minyo nga taga Carmen.
May usa kini ka samad pinusilan sa dughan nga gituohang maoy nakaingon sa hinanali niining kamatayon.
Matud pa ni SPO2 Masucol nga ilang gituohan nga ang namatay naghikog pinaagi sa pagpusil sa iyang dughan tungod usab sa mga pulbora nga namilit sa gisul-ob nga sapot niini.
Si SPO2 Masucol miingon nga base sa iyang gihimong imbestigasyon iyang nasuta nga gikan pa sa iyang balay ang biktima ug giingong paingon kini sa merkado sa nahisgotang lungsod.
Dugang pa niya nga iyang gihiklin ang anggulo sa tulis sanglit wala man nawagtang ang pitaka ug salapi niini.
Samtang ang revolver nga kalibre .38 ilang napalgan tapad usab sa nagbuy-od nga patay’ng lawas niini.
Gitataw ni SPO2 Masucol nga base sa iyang pakisusi ang biktima kinsa caretaker sa 18 ka ektaryas nga kalubihan sa maong lugar apan nag-atubang og reklamo nga gisang-at sa Philippine Coconut Authority (PCA) tungod sa pagpamutol sa mga lubi nga walay pagtugot sa tag-iya niini. – BANAT NEWS