CEBU, Philippines - Gika-alarma sa mga residente sa isla sa Mactan ang taho nga daghang mga peke nga kuwarta nga mikatap sa dakbayan sa Lapulapu nga mamiktima og mga gagmay’ng mga tindahan.
Apan ang hepe sa Crime Against Property Desk (kanhi Theft and Robbery Section) sa Lapulapu City Police Office mihimakak sa maong taho.
Matud pa ni Insp. William Homoc nga wala pa sila makadawat og reklamo sa mga pekeng kuwarta nga mikatap sa mga gagmay’ng tindahan sa Lapulapu.
Hinuon dunay mga biktima sa budol gang nga modangop sa ilang buhatan human mailad sa binandol nga pinutol nga papel nga pa-ibabwan og kuwarta, apan panagsa lang kini mahitabo.
Sukad sa pagsugod sa tuig 2010, wala pa sila makadawat og taho nga dunay mga tindahan sa dakbayan sa Lapulapu nga nabiktima sa maong mga modus operandi.
Hinuon mapasalamaton sa mga taho nga gipaabot ngadto sa media kalabot sa maong insidente ug gipaneguro ni Insp. Homoc nga ila kining panid-an ilabi na sa merkado publiko ug sa mga mall nga kasagaran anaa mahimutang ang mga gagmay’ng tindahan.
Sumala sa taho nga adunay mga gasoline station usab ang mabiktima sa maong binuang. – BANAT NEWS