CEBU, Philippines - Pormal nang gipasakaan og kaso si Gobernador Gwendolyn Garcia didto sa Ombudsman-Manila tungod sa pagpanghilabot niini sa legislative department sa lalawigan sa Sugbo tungod sa pagputol ug wala pag-renew sa mga kontrata sa mga kawani ubos sa buhatan ni Bise Gobernador Gregorio Sanchez Jr.
Ang consultant on organic farming sa buhatan ni Sanchez nga si Manuel Manuel, lumad sa lungsod sa Asturias mipasaka og upat ka kaso batok sa gobernador niadtong Hunyo 22.
Kini mao ang kalapasan sa Akta Republika 3019 (Anti Graft and Corrupt Practices Act paragraph 3), Usurpation of Legislative Powers ubos sa Art. 239, Sec.111 sa Revised Penal Code (RPC), Usurpation of Authority or Official Functions ubos sa Art. 177 sa RPC ug Falsification by Public Officer sa Akta Republika 171 sa RPC.
Giapil sa pagpasaka og kaso ni Manuel si Provincial Administrator Eduardo Habin ug ang legal officer nga si Atty. Marino Martinquilla.
Gisukip ni Manuel sa iyang giduso nga reklamo ang memorandum sa provincial administrator nga nagputol sa ilang kontrata niadtong Enero 4 ning tuiga hinungdan nga wala na ma-renew ang ilang kontrata sa pagkapupos niini niadtong Disyembre 31, 2009.
Gipasabot ni Manuel nga nanghilabot ang gobernador sa legislative department human kini magkabingkil tali sa bise gobernador bisan pa man og ubos sa legislative department ang gahin alang sa ilang suholan.
Matud ni Manuel diha sa iyang reklamo moabot og siyam sa 10 ka consultant sa buhatan sa legislative department wala gi-renew sa gobernador bisan pa man og adunay katungod pag-hire ug pag-renew sa kontrata sa mga kawani ubos sa legislative department mao ang bise gobernador.
Gibasehan ni Manuel sa iyang reklamo ang desisyon sa Korte Suprema sa kaso didto sa Occidental Mindoro niadtong 2005 nga nagtataw nga dili makapanghilabot ang gobernador pag-hire o pagtaktak sa mga kawani ubos sa legislative department diin diha gikuha ang gahin alang sa ilang suholan tungod kay ang bise gobernador ang adunay katungod niini.
Dugang pasabot ni Manuel nga didto niya sa ulohang buhatan sa Ombudsman-Manila gisang-at ang kaso tungod kay matud niya wala na siyay pagsalig sa buhatan sa Ombudsman dinhi sa Kabisay-an ubos sa pagdumala ni Deputy Ombudsman for the Visayas Pelagio Apostol gumikan usab sa kadaghang mga kaso nga gisang-at batok sa gobernador nga pabiling giyak-an ug walay gihimong aksiyon.
Gitumbok ni Manuel ang kaso sa overpricing sa katukoran sa Cebu International Convention Center (CICC) ug ang pagpalit sa Kapitolyo sa Balili property sa Tinaan, Naga sa kantidad nga sobra sa P98 milyones bisan sobra katunga sa 24 hektaryas niini naglubog sa tubig.
Matud ni Manuel pagkakaron wala gihapon sila makadawat sa ilang suholan gikan niadtong Enero tungod sa maong kamanduan sa gobernador pagputol sa ilang kontrata. – BANAT NEWS