CEBU, Philippines - Nailhan na ang mga mamumuno ni Manuel Ting, ang negosyanteng gibanhigan patay sa dalan F. Llamas, barangay Tisa, ning dakbayan ug gisusi sa Task Force Ting kining maong mga grupo kun mao ba usab ang mibanhig sa igsuon nga si Nicolas Ting sa barangay Cabancalan, siyudad sa Mandaue.
Nunot ning maong kalambuan, gibiyaan na sa kapolisan ang anggulo nga away sa pamilya, ug gisubay karon ang anggulo nga negosyo. Dungan usab niini, ang kabanay sa magsuong Ting miatubang sa media kagahapon aron imatuod nga wala sila mag-away-away.
Si Sr. Supt Melvin Buenafe, hepe sa Task Force Ting atol sa press conference sa Police Regional Office-7, ang hot pursuit operation sa task force batok sa mga mamumuno nga gisugdan niadtong gabii nga napatay si Manuel nagpadayon hangtod sa ilang pagkasikop.
Ang mga mamumuno, sumala pa ni Buenafe, nailhan pinaagi sa pagtumbok sa mga nakasaksi sa pagpamanhig. Ang mga mamumuno nanagan sa usa ka lugar sa lalawigan sa Sugbo.
Matud ni Buenafe nga ilang gitutokan sa imbestigasyon ang kalambigitan sa negosyo sa gipatay nga si Manuel ug ila nang giwagtang ang anggulo sa panag-away tali niya ug sa manghod (dili maguwang) nga si Nicolas.
Lakip hinuon sa gisusi sa task force ang pagbanhig usab ni Nicolas niadtong Lunes sa gabii sa Cabancalan, Mandaue aron pagtino sa posibilidad nga usa ra ang mitira sa magsuon.
Nagtuo ang kapolisan nga usa ra ka grupo ang mibanhig sa magsuon, tungod sa nakitang usa ra ka estilo ang pagtira.
Si Nicolas pabilin pang nagpaalim sa pribadong tambalanan sa dakbayan apan luwas na kini sa peligrong kahimtang.
Gipaningkamotan sa TF Ting nga mailhan ug mapasakaan og kasong murder ang mga mamumuno ni Manuel ug sa mibanhig ni Nicolas.
Sa susamang kalambuan, ang kinamagulangang mga anak sa magsuong Ting nga sila si Nizon “Jojo” Dizon Ting (anak ni Nicolas) ug Basil Ting (anak ni Manuel) mi-apelar sa mga sakop sa media ug sa publiko sa paghunong sa pagpakatap og mga sayop nga pagduda nga may kalambigitan sa trahedya ang ilang pamilya.
Gipasabot usab nilang Jojo ug Basil nga bisan nagkaaway ang ilang mga amahan, dili mahitabong mosangpot sila sa pinatyanay sa usa’g usa.
“Despite the known personal feud between our fathers, we believed that it is impossible that they will end up ganging on each other. Their personal feud is trivial to merit a violent end to it. No amount of justification or reasoning from our respective families, that our families are not involved in these attacks can satisfy the curious or the suspecting minds, but what we can assure ourselves and to each other is that our conscience is clear,” matud pa sa tipik sa pamahayag sa mag-agaw nga Ting.
Matud pa sa duha nga ang padayong paggula sa mga balita kabahin sa panagbangi sa ilang mga amahan wala makatabang sa imbestigasyon ug nakadugang pa hinuon sa kasakit sa ilang pamilya nga biktima sa maong trahedya.
Giawhag nila ang kapolisan nga paspasan ang imbestigasyon ug sikopon ang mga responsable sa duha ka krimen. Nanawagan usab sila sa mga testigos nga mokooperar sa imbestigasyon.
Samtang mipasalig sila nga ang ilang pamilya mohatag og gikinahanglang impormasyon alang sa daling kasulbaran sa kaso ug misaad nga magpabilin silang motahod sa balaod.
Kahinumduman nga si Nicolas gibanhigan niadtong Lunes sa wala mailhing tawo sa barangay Cabancalan, Mandaue ug nakaangkon og tulo ka samad pinusilan sa aping ug dughan, samtang si Manuel namatay gyud human makaangkon og 11 ka samad pinusilan sa ulo ug lawas sa dihang gibanhigan sa barangay Tisa, siyudad sa Sugbo sa Martes sa gabii.
Ang business community ug si Gob. Gwendolyn Garcia naalarma sa maong hitabo ug nanghinaot nga dili makabalda sa negosyo ug turismo ang nahitabo sa magsuong Ting. – BANAT NEWS