CEBU, Philippines - Usa ka amahan ang wala na makapaabot sa paghinumdom sa Father’s Day kagahapon human kini maghikog niadtong Sabado sa hapon gumikan sa pagtuong wala na siya’y kapuslanan sa iyang pamilya.
Ang paghikog nahitabo diha sa barangay Poblacion sa lungsod sa Santander ug giila sa kapolisan ang namatay nga si Patrick Jesus Idrial, 35, kinsa giingong migamit og bakos pagtuok sa iyang kaugalingon.
Matud pa ni PO2 Noel Stender base sa ilang impormasyong ilang nakuha gikan sa kabanay ni Idrial nga kaniadto pa magpunay og padungog og estoryang maghikog nalang kini.
Gumikan kay wala na siya’y natabang sa iyang pamilya gumikan kay wala siya’y trabaho maong kanunay kini maawayan sa iyang asawa matud pang PO2 Stender.
Dugang pa ni Stender nga sa mga miaging tuig nagumon sa ginadiling drugas si Idrial ug napriso na usab gumikan sa pagpanumbag niini ug pagsuway og tigbas sa iyang asawa, apan gipasaylo ra gihapon ug nakalingkawas.
Nakuha diha sa liog ni Idrial ang gibulibod nga tulo ka tiil nga gitas-ong bakus nga iyang gihikot sa sagunting sa ilang balay ug gidali pagdala sa Oslob District Hospital apan gideklarar nga patay na. – BANAT NEWS