Mga kawani sa City Hall bansayon

CEBU, Philippines - Usa ka pagbansay-bansay ang himuon alang sa tanang empleyado sa Cebu City Hall ilabi na kadtong mga bag-o aron masuhito sila sa kung unsa gyud ang ilang papel sa ilang pagtrabaho.

Ang hepe sa Cebu City Legislative Research Monitoring and Tracking Division nga si Roy Vincent Alix nagkanayon nga karong Hulyo 1 sugdan ang pagbansay-bansay.

 Usa sa mga itudlo unya mao ang uniform nga estilo sa pagbuhat og mga ordinansa ingon man usab ang pag-monitor niini aron hapsay na lang sa higayon nga dunay mga tawong gustong mosusi niini.

    Mobuhat usab sila og data base sa tanang ordinansa aron ila kini nga ma-monitor ug sa susamang higayon ma-implementar kini ngadto sa katawhan.

 “Dili mi gusto nga dunay mga ordinansa nga magbalik-balik maong natukod ang among division kay amo gyud nang tun-an kung wala pa’y kapareha ang gi-propose nga ordinance sa mga konsehal,” nagkanayon si Alix.

    Lakip sa itudlo unya ang proseso ug ang makuting paghikay sa mga dokumentos diha sa City Hall nga ipang-transact sa mga tawo aron dili usab magkatibulaag. (BANATNEWS)

Show comments