CEBU, Philippines - Mikabat sa 13 ka mga dispatcher ang nasikop sa kapolisan sa nagkalainlaing lugar ning dakbayan sa Sugbo sa miaging Martes.
Kini sa dihang gilusad sa Cebu City Anti-illegal Drugs Special Operations Task Group (CAIDSOTG) nga gipangulohan ni PO3 Brasilio Burenaga ang kampanya batok sa illegal nga drugas ug illegal dispatching.
Matud pa ni Burenaga nga ang maong mga dispatcher didto nila masikop sa Citilink terminal, ug sa dalan Jakosalem duol sa University of the Visayas.
Ang mga nasikop mao sila si Brandon Apostol Sontucidad, 29; Oliver Bayang Tubuyas, 30; Crispin Teves Ribusa, 29; Allan Abella Flores, 29; Joseph Abadiez Olita, 32; Akihiro Montesclaros, 18; Diomar Empuerlo Canen, 23; Arnulfo Justo, 27; Joel Sanyo Sestoso, 35.
Jayson Grate Añedo, 28; Jimmy Bellame Baguio, 23; Eddie Rayko Eliot, 29; ug Danilo Silvano Nuñez, 35.
Ang gihimo sa kapolisan maoy pagtuman sa ordinansa nga nagdili sa kalihokan sa dispatcher sa nagkalainlaing eskina ning dakbayan.
Nasayran sa kapolisan nga ang maong mga dispatcher ilado na usab kaayong mga snatcher o tingpanglabnihay ,ug tiggamit pa gyud og ginadiling drugas.
Gawas nga snatcher, manunggab usab kini sa drayber nga dili mohatag og tong kanila, sumala ni PO2 Norman Años, kinsa usa sa mga miyembro sa CAIDSOTG.
Matud pa ni Años nga mosamot na kadaghan ang mga dispatcher karong miabli na usab ang klase busa delikado kaayo kini sa mga estudyante kay gawas nga kini manglabnihay, mga tiggamit usab kini og illegal nga drugas.
Midugang usab siya nga hangtod nga dili mahurot ang mga dispatcher ning dakbayan, dili sila moundang sa ilang kampanya paggukod kanila.
Kasong illegal dispatching maoy isang-at sa kapolisan batok sa mga dinakpan. - Lalaine Mae Calatrava ug Melanie Beltran (BANAT NEWS)