CEBU, Philippines - Nahisama sa gibatobatoan ang iyang kaugalingon ang usa ka minor de edad nga lalaki nga nalumos human giingong iyang gihikot ang mga pinunitang puthaw ngadto sa iyang tiil ug milangoy sa dagat nga nakaingon sa iyang pagkalumos.
Base sa imbestigasyon sa Investigation and Detective Management Branch, si PO2 Marino Lufranco gikan nanguha og tinagak nga puthaw sa gibaraderong barko sa Pier 7 sa dakbayan sa Mandaue si Rolando Villegas,17, taga sitio Aroma sa barangay Subangdaku kauban ang mga higalang 17-anyos ug Leomar Custajas,20.
Sumala pa sa duha ngadto sa kapolisan human sila mamunit og mga puthaw gihigtan ni Villegas ang mga puthaw og pisi diha sa iyang tiil ug miambak sa dagat aron unta mobalik sa baybayon.
Apan nahibulong nalang silang wala na mobalik og lutaw si Villegas hinungdan nga dali silang mitawag sa kapolisan.
Si Lufranco nagkanayon nga ang insidente nahitabo alas-7 pasado ang takna sa buntag sa miaging adlaw. Sumala pang Lufranco nga wala mangawat ang mga batan-on kundili gitugutan silang makakuha og mga sobrang puthaw sa gibaraderong barko.
Ang mga frogmen sa Philippine Coast Guard nga sila si Seaman First Class Elmer Acosta ug Seaman Second Class Nilbert Gallo nga maoy miresponde sa maong dapit mao nay nakahaw-as sa biktima.
Ang duha ka frogmen sa PCG mitug-an ngadto sa kapolisan nga ilaha nalang gitangtang ang pisi nga gihikot sa tiil ni Villegas aron kini molutaw. (BANATNEWS)