CEBU, Philippines - Nalandig sa tambalanan ang security guard human kini pusila sa gidudahang mga kawatan kagahapon sa kaadlawon diha sa Villa Raya Subdivision, barangay Lawaan III, dakbayan sa Talisay.
Nakaangkon og samad pinusilan sa ibabaw’ng bahin sa iyang paa si Reynante Labrador, security guard sa maong subdivision dihang nahitabo ang insidente ug daling gidala ngadto sa South General Hospital sa dakbayan sa Naga.
Ang drayber sa habal-habal kinsa giingong gisakyan sa duha ka wala mailhing lalaki nga mipusil sa gwardiya mao si Rommel Lasola, 19, taga sitio Pagtambayayong, Lawaan III sikbit nga dapit sa nahisgutang subdivision kinsa nasikop diha sa ilang balay nila ni PO3 Arnold Damasco ug PO2 Leandro Azarcon human kini itudlo sa mga nakasaksi.
Si PO3 Eric Enad kinsa maoy imbestigador sa insidente sa pakighinabi niini sa Banat News kagahapon mibutyag nga usa sa residente sa subdivision nga si Reynaldo Cuizon, 51, nakabantay og duha ka lalaki nga misulod diha sa ilang koral ug gituohan niyang mga kawatan hinungdan nga migawas siya sa ilang balay ug misinggit og panabang.
Si Cuizon giingong gitabangan og pusil sa maong mga lalaki ug maayo na lang nga nakapasalipod kini ug wala maigo.
Si Labrador kinsa nakadungog sa buto-buto daling miresponde ug dihang paingon na siya ngadto sa lugar natagboan niya ang duha ka lalaki ug gipusil siya niini.
Ang gwardiya mibawos usab og pusil apan wala kini makasiguro kung nakaigo ba siya sa giingong mga kawatan nakit-ang misakay sa motorsiklo ni Lasola. (BANATNEWS)